Hingpit nang natiklo ug nagtingkagol karon sa selda sa kapulisan ang giilang Top 1 Most Wanted Person sa lebel-probinsya sa Bukidnon. Kini human sa gikasang hiniusang operasyon sa Purok 2, Barangay Libertad sa lungsod sa Quezon, niadtong Lunes sa gabii, Hunyo 8.
Giserbihan sa warrant of arrest ang suspek nga usa ka 20-anyos nga mag-uuma human kini mag-atubang og lima ka mga bug-at nga kasong kriminal. Naglakip kini sa tulo ka ihap sa statutory rape diin hingpit nga walay gitugot nga piyansa ang korte, ug duha ka ihap sa sexual assault nga adunay girekomendang piyansa nga nagkantidad og P90,000 matag usa.
Ang malampusong pagdakop gipahigayon pinaagi sa hiniusang pwersa sa Quezon Municipal Police Station (MPS), Provincial Mobile Force Company, Provincial Intelligence Unit, ug Regional Intelligence Unit 10. Sa kasamtangan, nagpabilin ang dinakpan sa kustodiya sa Quezon MPS alang sa saktong dokumentasyon samtang nagpaabot sa sunod nga kamanduan sa korte.