Nag-atubang karon sa dakong hagit ang sektor sa agrikultura sa Bukidnon gumikan sa sige’g pagsaka sa presyo sa lana dungan sa nagka-ubos nga suplay sa tubig tungod sa kakuwang sa pag-ulan sa miaging mga bulan. Sa pakighinabi sa Bombo Radyo Malaybalay ngadto kay Provincial Agriculturist Maria Lilith Turan, iyang gibutyag nga kini nga mga hagit mas misamot pa samtang nagkaduol ang hulga sa El Niño, diin misaka na sa 92 porsyento ang posibilidad sa pag-abot niini subay sa datus sa PAGASA.
Gitataw ni Turan nga labing delikado ug daling madaot ang mga tanom kon maigo sa grabeng kainit sa ilang reproductive stage o panahon sa pagpamulak ug pagpamunga. Gumikan niini, dinalian niyang giawhag ang mga mag-uuma nga magdaginot ug magpundok na og tubig pinaagi sa rainwater harvesting. Giklaro usab sa opisyal nga ang El Niño dili nagpasabot nga hingpit nang walay ulan tungod kay duna gihapong mga weather disturbance o kalit nga pag-ulan nga posibleng masinati sa nasod.Isip pangandam sa posibleng dako nga danyos ug pagkalugi sa tibuok probinsya, gipasalig sa Provincial Agriculture Office o PAGRO nga duna na’y nakataganang standby pondo ug mga programa gikan sa Department of Agriculture (DA) ug sa LDRRM Fund. Kining maong ayuda daling mapalihok aron i-abag sa mga mag-uuma kon ugaling mosulod na ang grabeng hulaw.