Gipanghimakak ni kanhi Congressman Mike Defensor ang mga alegasyon nga iyang gisuholan og P5 milyon matag usa ang 18 ka nagpailang ex-Marines aron motestigo sa pagdungog sa Senate Blue Ribbon Committee kalabot sa giingong mga anomalya sa flood control projects.
Matud ni Defensor, tinumotumo ug walay basihanan ang mga pasangil batok kaniya.
Gitawag usab sa kanhing kongresista nga “double hearsay” ang impormasyong nadawat sa National Bureau of Investigation (NBI).
Sumala ni Defensor, iyang nabasa mismo ang affidavit sa usa ka tawo nga naghatag og impormasyon nga nakuha ra usab gikan sa iyang umagad (son-in-law), kinsa nag-ingon nga adunay gihatag nga P5 milyon apan wala pa matud pa kini mabayri sa hingpit.
Gipasiugda ni Defensor nga walay bisan usa sa mga kanhing sundalo nga direktang nagsulti sa maong istorya, ug ang nahisgutan nga indibidwal nakadungog lamang niini gikan sa iyang ugangan nga usa matud pa nga kauban sa 18 ka ex-Marines.
Tungod niini, gikuwestiyon ni Defensor nganong gihatagan kini og pagtagad sa NBI bisan wala pa kini mapamatud-an ug usa lamang ka dili beripikadong impormasyon.
Samtang, giisyuhan na sa NBI si Defensor og subpoena niadtong Martes may kalabotan sa maong mga alegasyon. S
umala sa kanhing mambabalaod, mokonsulta una siya sa iyang abogado bahin sa maong subpoena.
Kahinumduman, kaniadto pa niyang gipanghimakak ang alegasyon nga siya ang handler sa 18 ka ex-Marines.
Apan bisan pa sa iyang pagdumili nga adunay relasyon kanila, sigon ni Defensor nga ipadayon gihapon niya ang pagtabang sa grupo human sa nahitabo kang Orly Guteza, ang testigo nga milutaw ug mitestigo sa giingong kickback scheme apan kalit lang nawala human sa iyang pagpamatuod.