Balhog karon sa prisohan ang usa ka singkwenta i-kwatro anyos nga lalaki human masikop sa mga otoridad atol sa gikasang buy-bust operation tungang gabii sa Purok Uno Barangay Lumbo siyudad sa Valencia Bukidnon.
Ang suspek nga giila sa kapolisan nga usa ka bag-ong natumbok nga drug personality sa maong dapit ug residente sa Barangay Poblacion nadakpan sa gihimong operasyon sa Valencia City Police Station alas dose traynta i-says sa kaadlawon niadtong Domingo.
Nasakmit gikan sa posisyon sa suspek ang upat ka sachet sa gituohang shabu nga motimbang og singko punto tres gramos ug nagkantidad og kapin traynta i-says mil ka pesos. Narekober usab sa mga otoridad ang gigamit nga buy-bust money usa ka cellphone ug plastik nga sudlanan sa droga.
Kasong paglapas sa Comprehensive Dangerous Drugs Act of 2002 ang gihikay na sa kapolisan batok sa suspek samtang ang mga ebidensya giduso na ngadto sa Bukidnon Provincial Forensic Unit alang sa laboratory examination.