Nanawagan og dinaliang rehabilitasyon si Barangay Kalasungay IPMR Datu Jomar Sario sa Malinao Creek ug Kiagong Falls sa Malaybalay City human kini grabeng nahugawan ug nadaot sa usa ka road construction project.
Matud ni Sario, natabunan na sa anas, balas, ug yuta ang maong sapa ug busay nga mopaingon unta sa Tagoloan River. Kahinumduman nga una nang nag-inspeksyon ang DPWH ug gipamulta na og P341,000 ang kontraktor, apan nagpabilin gihapong lubog ug barado ang maong eco-tourism sites.
Gawas sa kalikopan, apektado na usab ang panginabuhian sa mga lumad, partikular sa pagpangisda ug pagpanguma. Nanawagan karon ang komunidad nga tumanon sa kontraktor ang saad niini nga ibalik sa orihinal nga dekalidad ug kaputli ang maong mga tinubdan sa tubig alang sa umaabot nga henerasyon.