Malampuson nga mipahigayon og operasyon ang kapulisan sa Bukidnon batok sa pagpamaligya sa smuggled nga sigarilyo sa mga munisipyo sa Talakag, Impasugong, Kitaotao ug Kalilangan, Bukidnon.
Ang Talakag MPS, nakumpiska og 5 reams sa smuggled nga sigarilyo nga walay health warning, nga gibanabanang nagkantidad og P4,000.
Sa Impasugong MPS, nakumpiska ang 5 ka reams ug 9 ka pakete nga smuggled nga sigarilyo gikan sa usa ka 40 anyos nga babaye nga tag-iya og tindahan sa Poblacion, nga nagkantidad og P3,000.
Ang Kitaotao MPS, mikumpiska sa nagkalain-laing tindahan sa Brgy. Poblacion og 8 reams ug 8 packs sa smuggled nga sigarilyo nga dunay kinatibuk-ang kantidad sa P7,040.
Ug sa Kalilangan MPS, mikumpiska og 10 reams nga smuggled nga sigarilyo nga dunay kinatibuk-ang kantidad nga P8,000.
Ang tanang nakumpiskang sigarilyo anaa na sa kustodiya sa tagsa-tagsa ka police station alang sa tukmang disposasyon. Samtang, padayon ang kampanya sa kapulisan batok sa pagpamaligya sa smuggled nga sigarilyo sa probinsya.