Magpasaka og reklamo ang Philippine National Police–Criminal Investigation and Detection Group (PNP-CIDG) batok kang Senador Robin Padilla ug uban pa tungod sa giingong pagtabang kang Senador Ronald “Bato” dela Rosa sa paglikay sa mga otoridad.
Sa statement nga gipagawas karong Miyerkules, Mayo 27, sigon sa CIDG nga ilang i-refer sa National Prosecution Service sa Department of Justice (DOJ) ang reklamo alang sa giingong paglapas sa Presidential Decree No. 1829 o obstruction of justice.
Matud sa ahensya, ang pagsakay ni dela Rosa sa sakyanan ni Padilla dili lang ordinaryong “hitch ride” kundili usa ka “highly coordinated” ug giandam daan nga maniobra aron malikayan ang pag-detect sa iyang paggawas sa Senado niadtong kaadlawon sa Mayo 14.
Base usab sa imbestigasyon, adunay laing sakyanan nga misunod sa sakyanan ni Padilla nga giingong nagsilbing security escort ug backup vehicle atol sa maong operasyon.
Gipasabot sa CIDG nga ang ilang pagpasaka og reklamo kabahin sa ilang mandato nga imbestigahan ang mga krimen ug ipatuman ang balaod sa patas ug walay pinalabi.
Dugang pa sa CIDG nga kon adunay mga indibidwal nga aktibong motabang sa paglikay sa pag-aresto o pag-ikyas sa usa ka ginapangita sa balaod, makaapekto kini sa justice system ug public order.
Gipasiugda sa ahensya nga ang obstruction of justice adunay katugbang nga criminal prosecution.
Sa laing bahin, una nang gipanghimakak ni Senador Padilla nga miikyas si dela Rosa, ug sigon niini nga nihangyo lamang ang iyang kaubang senador nga makisakay paggawas sa Senado human sa nahitabong shooting incident niadtong gabii sa Mayo 13.