Nagpahimangno ang International Criminal Court (ICC) Assistant to Counsel nga si Atty. Kristina Conti nga posibleng makaapekto sa kahimtang ni kanhi Pangulong Rodrigo Duterte ang pahayag ni Senate President Alan Peter Cayetano nga nagdepensa sa war on drugs sa miaging administrasyon.
Sumala ni Conti, ang maong pamahayag ni Cayetano mahimong makita sa ICC nga timailhan nga lig-on pa ang impluwensiya ug koneksiyon ni Duterte sa Pilipinas, nga posibleng makapalig-on sa kabalaka sa korte nga adunay motabang kaniya kung makagawas o makabalik sa nasud.
Matud ni Conti, ang ICC mahimong motan-aw nga adunay risgo nga posibleng makaikyas o maprotektahan si Duterte, busa mahimo kining ikonsiderar sa desisyon kung tugotan ba siya nga temporaryong makalaya samtang nagpadayon ang kaso.
Gipunting usab sa ICC ang naunang pamahayag ni Cayetano nga naghulagway sa war on drugs isip “pro-life” campaign, nga giingong nagtuon sa pagpanalipod sa komunidad batok sa ilegal nga droga.
Samtang, wala pa’y opisyal nga reaksyon si Cayetano sa maong pasidaan.