Gipadayag ni Akbayan Party-list Representative Perci Cendaña nga posible nga mag-atubang og kaso si Senador Robin Padilla ilawom sa Rome Statute ug obstruction of justice tungod sa pag-angkon sa pagtabang sa pagbiya ni Senador Ronald “Bato” dela Rosa sa Senado.
Sumala ni Cendaña, si Padilla mismo ang miangkon nga iyang gisakyan si Dela Rosa paingon gawas sa Senado gamit ang iyang SUV niadtong kadlawon sa miaging semana, bisan pa man nga giila na sa Department of Justice ang arrest warrant gikan sa International Criminal Court (ICC).
Gipasabot sa mambabalaod nga ang maong aksyon mahimong mosulod sa Article 70 sa Rome Statute ug Presidential Decree 1829 nga nagasilot sa mga mosulay pagtabang o pag-obstruct sa pagpatuman sa hustisya, ilabi na sa paglikay sa pag-aresto sa usa ka indibidwal.
Tungod niini, nanawagan si Cendaña sa mga otoridad nga imbestigahan si Padilla ug posibleng ipatuman ang nationwide manhunt alang kang Dela Rosa.
Matud pa ni Cendaña nga imbes depensahan, ang giangkon ni Padilla mahimong giisip nga pag-ako sa responsibilidad sa giingong pagtabang sa pag-ikyas sa senador, nga usa ka seryosong kaso sa obstruction of justice.