Gitan-aw sa usa ka labor advocate nga si Atty. Proculo T. Sarmen nga ang nagkagrabe nga political crisis sa nasud maoy nagduso sa kakulang sa koordinasyon sa kalit-kalit nga pagsira sa pipila ka mga establisimento, nga miresulta sa pagkawala sa trabaho sa daghang mamumuo.
Sumala kaniya, ang maong sitwasyon nagpakita nga naapektuhan ang mga trabahante tungod kay nasentro ang atensyon sa kagamhanan ug uban pang sektor sa mga isyu sa politika imbis sa pagpanalipod sa ekonomiya ug trabaho.
Gipasabot sa abogado nga daghang empleyado ang dali ra natangtang sa trabaho ug nawad-an og panginabuhian tungod sa pagsira sa mga negosyo nga walay klarong konsultasyon ug plano alang sa labor sector.
Gipasiugda usab niini nga kinahanglan adunay mas klaro ug responsable nga pagdumala aron malikayan ang pagbalik-balik sa sama nga krisis nga makaapekto sa ordinaryong mga trabahante.