Gipadayag usab ni Atty. Eddie Cuaresma nga walay legal nga babag sa pag-apil ni Bukidnon 2nd District Representative John Flores isip prosecutor sa impeachment trial batok kang Vice President Sara Duterte bisan pa man nga nag-abstain siya sa botohan sa Articles of Impeachment sa Kamara.
Matud sa abogado, wala’y probisyon sa balaod nga nag-ingon nga ang mahimo lamang nga prosecutors mao kadtong mibotar pabor sa impeachment.
Apan giila usab niini nga posibleng adunay “bikil” o pagduda sa panan-aw sa publiko gumikan sa pag-angkon ni Flores nga naapektohan ang iyang desisyon sa kusog nga suporta sa mga Duterte sa Mindanao.
Dugang pa sa abogado nga mas maayo unta kon ang napiling prosecutors mao kadtong klarong mibotar og “yes” aron malikayan ang pagduda sa ilang motibo ug mapakita ang lig-on nga baruganan sa prosecution panel.
Bisan pa man niini, gipasabot nga posible gihapon nga matinud-anon ug propesyonal nga matuman ni Flores ang iyang tahas isip prosecutor atol sa impeachment trial.