Gimandoan ang Philippine National Police ug National Bureau of Investigation nga dakpon si Senador Ronald “Bato” dela Rosa.
Gikumpirma ni Department of Justice Sec. Fredderick Vida nga giisip nang “fugitive from justice” si Dela Rosa ug kinahanglan siyang dad-on sa International Criminal Court aron moatubang sa mga kaso nga gisang-at batok kaniya.
Sa pikas bahin, nagpagawas ang kampo ni Senador Ronald “Bato” dela Rosa og pamahayag human gibasura sa Korte Suprema ang iyang hangyo nga mag-issue og Temporary Restraining Order batok sa implementasyon sa ICC arrest warrant.
Sumala sa iyang abogado nga si Atty. Israelito Torreon, ilang gitahod ang desisyon sa korte apan gipatin-aw nga interim relief pa lamang ang gisalikway ug wala pa masulbad ang tibuok petisyon.
Gipunting sa kampo sa senador nga padayon pa nilang gi-question ang legalidad sa pagpatuman sa foreign arrest warrant dinhi sa Pilipinas, ug nga kinahanglan pa gihapon og klaro nga desisyon sa Korte Suprema kabahin sa cooperation sa gobyerno ug International Criminal Court.
Gipunting usab nila ang isyu sa sovereignty ug due process sa nasud.
Nagpasalig ang kampo ni Dela Rosa nga magpasaka og motion for reconsideration human sa pagbasura sa Korte Suprema ang ilang gihangyo nga temporary restraining order (TRO) batok sa posibleng pag-aresto ug pagbalhin kaniya ngadto sa kustodiya sa International Criminal Court (ICC).
Ang Korte Suprema gilauman nga mopagawas sa kumpletong resolusyon sa sunod nga semana.