Gipahayag sa Department of Justice (DOJ) nga hingpit nang ipaaresto sa mga otoridad ang mambabalaod nga si Senador Ronald “Bato” Dela Rosa.
Sa usa ka opisyal nga pahayag karong adlawa, gitahasan na sa DOJ ang Philippine National Police (PNP) ug National Bureau of Investigation (NBI) sa pagpatuman sa arrest warrant gikan sa International Criminal Court (ICI), diin giisip na karon nga usa ka pugante ang senador. Gipakahugtan ni Justice Secretary Fredderick Vida nga angay gayod nga madala si Dela Rosa ngadto sa The Netherlands aron atubangon sa international tribunal ang alegasyon sa kasong crimes against humanity labot sa kontrobersyal nga war on drugs sa miaging administrasyon.
Sumala sa kalihim, mapatuman na ang maong warrant kaabag ang PNP ug NBI human gibasura sa Korte Suprema ang hangyo sa senador alang sa temporaryong proteksyon. Tungod niini, gitangtang na sa DOJ ang kanhi kondisyon nga arestuhin lamang ang senador kon mosulay kini sa pagbiya sa nasod. Sa oras nga makit-an si Dela Rosa, mahimo na siyang dinalian nga dakpon sa mga otoridad bisan wala pa’y pinal nga desisyon ang Korte Suprema sa legalidad sa proseso.
Sa pikas bahin, mibalibad si Sec. Vida sa pagtubag kon asa gyod dapit dad-on ang senador sa oras nga maaresto kini, diin iyang gipahayag nga usa kini ka operational matter ug kinahanglang isipong sekreto aron dili maunsiami ang dagan sa maong operasyon samtang kasamtangan nang gipangita sa mga otoridad ang mambabalaod human kini mibiya sa kustodiya sa Senado sa miaging semana.