Nag-positibo sa gunpowder residue ang usa ka volunteer sa National Bureau of Investigation (NBI) nga gi-aresto may kalabotan sa nahitabong pagpamusil sulod sa Senado, sumala sa Southern Police District (SPD) niadtong Domingo sa gabii.
Matud ni SPD Public Information Office chief Police Lt. Margaret Panaga, base sa ilang laboratory examination, “positive sa presence of gunpowder” ang suspek nga giila sa alyas nga “Mel Oragon.”
Ang suspek gi-aresto human sa insidente ug gilayon nga gi-under sa inquest proceedings tungod sa mga kaso nga paglapas sa Republic Act 10591 o Comprehensive Firearms and Ammunition Regulation Act, alarm and scandal, direct assault, trespass to property, ug paglapas sa security protocols sa Senado.
Matod sa mga otoridad, nahitabo ang insidente niadtong Miyerkules sa gabii sulod sa ikaduhang andana sa Senado samtang naka-lockdown ang lugar, nga miresulta sa kahadlok ug kagubot sa sulod sa institusyon.
Base sa unang imbestigasyon, usa ka wala pa matino nga kalibre sa armas ang giingong gigamit sa suspek sa pagpabuto og pipila ka higayon sulod sa Senate compound sa GSIS area, mga alas-7:50 sa gabii.
Samtang, gipunting sa abogado ug asawa sa suspek nga siya usa lamang ka driver sa usa sa mga NBI operatives ug dili usa ka regular nga empleyado sa maong ahensya.