Opisyal nang gilusad sa 10th Regional Community Defense Group (10RCDG), Reserve Command sa Philippine Army, ang pag-abli sa ROTC Summer Camp Training (RSCT) para sa mga kadete sa Military Science-3. Ang pormal nga seremonyas gipahigayon sa grandstand sa 403rd Infantry Brigade sa Camp Osito D. Bahian, Barangay 10 sa dakbayan sa Malaybalay.
Gitambungan kini sa mga kadagkoan sa militar, mga miyembro sa training staff, ug gatusan ka mga kadete nga mosalmot sa maong rigid training.
Ang nag-unang tumong niining tinuig nga summer camp mao ang pagpalig-on pa sa disiplina, katakos sa pagdumala kon (leadership), kalig-on sa baruganan, ug kaandam sa militar sa mga batan-ong kadete.
Pinaagi sa usa ka instrukturadong kurikulum, tinguha niini nga magsilbing lig-on nga pundasyon alang sa umaabot nga serbisyo sa nasud.
Kabahin sa maong pormal nga pag-abli ang presentasyon sa nagkadaiyang yunit ug ang pagpaambit sa mga opisyal nga ‘training directives’ nga maoy magsilbing giya sa mga trainees.