Nakatingkagol na karon sa selda sa kapulisan ang usa ka 66-anyos nga lalaki human niini gitigbas ang iyang kaugalingong igsoon niadtong Lunes sa buntag sa Purok 2, Barangay Mabuhay, ning dakbayan.
Matod pa sa Valencia City Police Station, kalit lang miatake ang suspek samtang nanghugas og plato sa gawas sa balay ang 64-anyos nga biktima. Gigamit sa suspek ang usa ka “lampas” diin naigo ang biktima sa likod nga bahin sa ulo, butang nga dakong hinungdan sa dinaliang pagdala kaniya sa Polymedic General Hospital aron matambalan.
Gilayon usab nga miresponde ang mga personahe sa Revitalized Pulis Sa Barangay (RPSB) hinungdan sa pagkasikop sa suspek ug pagrekober sa hinagiban. Sa inisyal nga imbestigasyon, wala pa’y natino nga klarong motibo sa maong pagpangatake.
Sa pagkakaron, mag-atubang na sa kasong frustrated parricide o physical injuries batok sa suspek, samtang nakatingkagol pa sa custodial facility sa kapulisan ang maong lalaki alang sa tukmang disposisyon.