Nakabsan sa kinabuhi ang usa ka 53-anyos nga sakop sa Barangay Public Safety Office (BPSO) samtang kapin sa napulo ka kaubanan niini ang naangol human mabangga ang ilang gisakyan nga Mazda Titan sa Kulaaman Bridge, Brgy. Maluko, Manolo Fortich, kagahapon adlawa Mayo 8, 2026.
Ang biktima giila nga si George Jumamil, kinsa gideklarang dead on arrival sa doktor, samtang ang drayber sa sakyanan giila nga si Febtuban Sawalan Morales.
Sa pakighinabi sa kapulisan, nasayran nga gikan sa tulo ka adlaw nga water rescue training sa Talisayan ang grupo ug pabalik na matud pa sa Malaybalay City sa dihang nahitabo ang trahedya pasado ala-1:20 sa hapon. Base sa imbestigasyon ni PLTCol Rogie C. Ortencio, hepe sa Manolo Fortich MPS, gidudahang napalyar o nungot ang brake sa sakyanan hinungdan nga nawad-an og kontrol ang drayber.
Nunot sa problema sa brake, mitipas ang sakyanan sa pikas lane diin niigo kini sa usa ka nakaparada nga motorsiklo ug usa ka fruit stand sa daplin sa dapit sa nahitaboan hinungdan sa maong makalilisang nga insidente.
Maayo na lamang walay laing sibilyan nga naigo o naangol sa maong dapit.
Sa pagkakaron, padayon pa ang lawom nga pagsusi sa mga otoridad aron hingpit nga matino ang tanang sirkumstansya sa maong disgrasya.