Mag-amahan sa New York, nakatala og Guinness tungod sa “pinakalapad nga dila” 

Nakabungkag og bag-ong dungog sa Guinness World Records ang usa ka mag-amahan gikan sa Syracuse, New York, tungod sa talagsaon ug labing lapad nga dila sa tibuok kalibutan.

Ang maong indibidwal mao sila si Byron Schlenker, nga gianggaan og “Gobfather,” ug ang iyang anak nga si Emily.

Sila ang narekord nga labing unang parent-child duo nga naghupot sa maong titulo sa kasaysayan.

Base sa opisyal nga sukod, ang dila ni Byron niabot ngadto na sa 8.57 sentimetro (3.37 ka pulgada), samtang ang dila usab ni Emily adunay gilapdon nga 7.33 sentimetro (2.89 ka pulgada).

Sumala sa report sa Barcroft Media, bisan kon ang dila usa ka matang sa kaunuran o muscle, ang gidak-on sa ilaha giisip nga talagsaon ug dili basta-basta makit-an sa uban.