Gitawag ni Senior Deputy Minority Leader ug ML Party-list Rep. Leila de Lima nga “offensive” ug “unfair” ang pamahayag ni Batangas 1st District Rep. Leandro Leviste nga nag-ingon apil ang tanang kongresista sa “vote buying.”
Sumala ni De Lima, dili igo nga basta na lang tangtangon o i-strike out sa rekord ang maong alegasyon. Dugang pa nga kinahanglan personal nga bawi-on ni Leviste ang pamahayag niini.
Nagsugod ang isyu human sa giingong alegasyon ni Leviste nga adunay pipila ka mga kongresista nga nalambigit sa vote buying, nga dali nga nakapukaw og reaksyon gikan sa ubang miyembro sa Kamara.
Sa dihang gihatagan siya og higayon nga mopatin-aw, sigon ni Leviste nga dili tanan nga mambabalaod nalakip sa vote buying.
Gi-withdraw usab nini ang iyang unang halapad nga pamahayag.
Matod niya, adunay pipila ka mga miyembro sa Kongreso nga wala maglapas sa election laws ug dili angay sabton nga iyang giingon nga tanan nalambigit.
Samtang, gikuwestyon usab sa ubang mga mambabatas ang basehan sa mga alegasyon ni Leviste batok kang Executive Secretary Ralph Recto ug sa uban pa, lakip na ang giingong dako nga campaign spending sa Batangas.
Giingon sa kampo ni Recto nga walay basehan ang mga pasangil ug gitawag pa nila si Leviste nga “liar” sa usa ka naunang pahayag.
Tubag ni Leviste, dili siya bakakon ug dili niya gustong ilaron ang katawhan.
Matud ni Leviste, daghan ang nakahibalo nga lapad ang vote buying sa nasud ug usahay moabot pa og milyon o bilyon ka piso ang gigasto sa kampanya.
Sa pagkakaron, gi-refer na sa plenaryo ang maong isyu ngadto sa Committee on Rules aron masusi ug mabuhatan og angay nga aksyon.