VALENCIA CITY – Tingkagol na sa prisuhan ang usa ka 38-anyos nga lalaki human masikop sa gihimong buy-bust operation sa Barangay Lurogan, ning dakbayan, niadtong Mayo 4.
Naila ang suspek sa alyas nga “Siken,” kinsa nasikop sa hiniusa nga operasyon sa Valencia City Police Station pasado alas-10:56 sa gabii. Narekober gikan sa iyang posisyon ang upat ka sachet sa ginadudahang shabu nga duna’y gibug-aton nga 6.2 gramos ug kantidad nga P42,160. Lakip sa nasakmit ang buy-bust money ug usa ka coin purse nga gihimong sudlanan sa ilegal nga droga.
Sa pagkakaron, gidetiner na ang suspek sa Valencia CPS samtang giandam na ang pagpasaka og kasong paglapas sa Comprehensive Dangerous Drugs Act of 2002. Ang mga ebidensya ang gipasa na usab ngadto sa forensic unit alang sa kumpirmasyon ug eksaminasyon.