VALENCIA CITY, BUKIDNON – Subling gidakop sa mga otoridad ang giilang suspek sa linuog nga pagpanglugos-patay sa usa ka 15-anyos nga estudyante sa dakbayan sa Valencia.
Ang suspek nga si Marlon Abdun Rosaot, 38-anyos, nakagawas unta kadiyot human na-dismiss ang kasong Direct Assault nga gipasaka batok kaniya. Apan, daling gisilbi sa kapulisan ang warrant of arrest alang sa mas seryosong kaso nga Rape with Homicide nga nagpabiling lig-on sa korte.
Kahinumduman nga si Rosaot ang gitudlong responsable sa brutal nga kamatayon sa usa ka Grade 9 student niadtong Enero, kansang lawas nakit-an sa usa ka katubhan sa Sitio Sinait, Barangay Dagat-Kidavao. Ang biktima gipunggotan pa og ulo ug giingong gipanamastamasan sa suspek samtang pauli gikan sa tunghaan.
Sa pagkakaron, nagtingkagol na usab sa prisuhan ang suspek diin giisip siya nga Top 6 Regional Most Wanted Person. Walay gitugot nga piyansa ang korte alang sa iyang temporaryong kagawasan samtang gihulat ang pagpadayon sa husay sa iyang kaso.