Hugot nga gipanghimakak ni House Committee on Justice Chairperson Gerville Luistro ang alegasyon ni Rep. Paolo Duterte nga giingong gipanghulga ang mga mambabalaod aron suportahan ang impeachment batok kang Vice President Sara Duterte.
Sumala sa pamahayag ni Duterte, adunay mga tawag nga gihimo ngadto sa mga chief of staff sa mga kongresista aron impluwensiyahan ang ilang boto, ug giingon pa nga tangtangon ang pondo sa ilang distrito kon dili mosunod.
Apan giingon ni Luistro nga walay kamatuoran ang maong alegasyon, ug siya mismo nga chairperson wala makadawat og bisan unsang tawag o pressure kabahin sa iyang desisyon o sa pagdumala sa pagdungog.
Gipadayag usab niini nga adunay ubang miyembro sa House Committee on Justice nga naa sa gawas sa nasud nga nangayo og kahigayonan nga makabotar online, apan wala kini niya tugoti aron mapabilin ang patas nga proseso sa mga personal nga mitambong sa hearing.
Kahinumduman nga mitapos ang botasyon sa komite sa 53-0 pabor sa pagpadayon sa impeachment case, ug matud pa ni Luistro, mas daghan pa unta ang mibotar kon gitugotan ang online voting.
Sa kinatibuk-an, gipasiugda ni Luistro nga ang proseso sa komite gipahigayon sa hustong paagi ug walay nahitabong pagpanghulga o pagpamugos sa mga miyembro.