Gihisgutan ang padayon nga problema sa baha sa Valencia City, ilabi na karon nga nagkaduol na ang ting-ulan.
Giingon nga ang siyudad kanunay makasinati og pagbaha, labi na kung kusog ang ulan, nga nakaapekto sa mga komunidad ug barangay.
Sa pakighinabi sa Bombo Radyo Malaybalay kang Atty. Heinz Villanueva City Administrator -Valencia City, Bukidnon, nga sa milabay’ng flash flood nga nahitabo niadtong September 17, 2025 nga giingong naggikan sa Panlibatuhan Creek.
Tungod niini, naapektuhan ang pipila ka barangay tungod sa pag-awas sa tubig nga gikan sa creek padulong sa ubos nga lugar.
Gi-prioritize karon sa lokal nga panggamhanan ang mga flood control projects aron masulbad ang problema sa baha.
Lakip niini ang ₱100 milyon nga proyekto sa Panlibatuhan Creek padulong sa Purok 13, ug laing parehas nga proyekto sa Barangay Sugod.
Gipasiugda sa mga opisyal nga tinuod ug padayon ang implementasyon sa maong mga proyekto, ug gipaniguro nga dili kini “ghost projects” kundili aktuwal nga imprastraktura nga makatabang sa pagpakunhod sa baha.
Sa kinatibuk-an, ang diskusyon nagpakita nga ang lokal nga gobyerno naghatag og dako nga prayoridad sa flood control aron mapanalipdan ang mga residente ug malikayan ang mas grabe nga epekto sa umaabot nga ting-ulan.