Usa ka 75-anyos nga bedridden nga lalaki ang nakabsan sa kinabuhi samtang ang iyang 72-anyos nga asawa nakaangkon og grabeng paso human maugdaw ang ilang panimalay sa Purok 1, Barangay Poblacion, Kadingilan, niadtong gabii sa Abril 26, 2026.
Sa report gikan sa Bureau of Fire Protection (BFP), nagsugod ang kalayo alas 9:00 sa gabii. Nasayran nga naluwas sa mga mabinantayong sibilyan ang asawa sa biktima ug daling gidala sa Kibawe Provincial Hospital alang sa dinaliang medikal nga pagtambal.
Hinuon, wala na masalbar pa ang 75-anyos nga biktima kinsa napalgan na lamang nga wala na’y kinabuhi sa sulod sa naugdaw nga balay human sa gideklarar nga “fire out” alas 9:15 sa gabii.
Subay sa inisyal nga imbestigasyon sa BFP, gituohang nagsugod ang sunog sa kwarto sa magtiayon tungod sa kandila nga kanunay nilang ginasindihan matag gabii. Gibana-bana nga mikabat sa ₱10,000 ang danyos sa kabtangan. Sa pagkakaron, nakig-alayon na ang BFP sa Kadingilan Municipal Police Station alang sa pagkompleto sa imbestigasyon ug husto nga pagdumala sa maong trahedya.