Positibo ang reaksyon ni kanhi Senador Antonio Trillanes IV human gikumpirma sa Anti-Money Laundering Council (AMLC) ang iyang mga gibutyag.
Human sa iyang pagtambong sa ikatulong pagdungog sa House Justice Committee kabahin sa impeachment batok kang Vice President Sara Duterte, gipadayag ni Trillanes ang iyang kahupayan sa pagkumpirma sa iyang mga pahayag.
Matud ni Trillanes, “I feel relieved” human mismong AMLC ang nagpamatuod sa iyang gipublikar nga impormasyon may kalabotan sa giingong mga bank transactions sa pamilya Duterte.
Bisan pa niini, giangkon niya nga nakaguol nga napulo ka tuig pa ang nilabay una kini napadayag, ilabi na sa 18 ka transaksyon nga nagkantidad og milyones ka piso.
Naglaum ang kanhi mambabalaod nga magpadayon ang impeachment hearings aron, matod pa niya, matangtang ang giingong pagpanglimbong sa publiko.
Dugang pa niini nga ang mga pundo matud pa gikan sa ilegal nga droga, ug nanawagan sa publiko nga mahimong alerto ug mutuo sa mga rebelasyon nga gipamatud-an na.
Gihangyo usab niini ang publiko nga saligan siya sa mga impormasyong iyang gipadayag, ug giingon nga dili kini binuhat-buhat lamang.
Sa laing bahin, mitubag si Vice President Sara Duterte nga limpyo ang iyang service record ug wala siya’y kaso nga may kalabotan sa sayop nga paggamit sa pondo sa gobyerno.