Dakpan ang usa ka lalaki human kini masakpang aktwal nga nangawat og krudo gikan sa usa ka trak didto sa Barangay Kawilihan, Don Carlos, Bukidnon, niadtong gabii sa Abril 24, 2026.
Base sa report , naila ang suspek nga usa ka 25-anyos nga lalaki ug lumulupyo sa maong dapit. Nasayran nga pasado alas 8:20 sa gabii sa dihang nasakpan sa usa ka saksi ang suspek nga nagkarga na sa usa ka plastic container nga adunay sulod nga gibana-banaang 30 ka litrong krudo nga nagkantidad og P2,790.
Gilayon nga gitaho sa saksi ang panghitabo ngadto sa tag-iya sa trak, hinungdan sa dinaliang pagresponde sa mga duty CVO sa barangay ug pagkasikop sa suspetsado.
Ang maong lalaki giturn-over ni Brgy. Captain Romeo Belisario ngadto sa Don Carlos Municipal Police Station (MPS) human mapahibalo sa iyang mga katungod subay sa balaod.
Kasamtangang anaa na sa kustodiya karon sa kapulisan ang suspetsado lakip na ang nabawi nga ebidensya alang sa tukmang disposisyon sa kaso.