Patay ang duha ka drayber sa motorsiklo human nagbangga ang ilang mga sakyanan sa Bypass Road, Purok 1, Barangay Casisang, Malaybalay City, Bukidnon niadtong Abril 19, 2026, mga alas 9:30 sa gabii.
Base sa report, nailhan ang mga biktima nga nagmaneho sa Honda CFT125 ug Yamaha Mio nga nalambigit sa aksidente.
Sa imbestigasyon, nasayran nga ang usa ka motorsiklo nagpadulong sa northbound nga walay suga o headlight samtang ang usa mitipas sa pikas lane hinungdan sa diretsong bangga.
Tungod sa kakusog sa impact, nabalintong ang duha ka motorsiklo sa semento ug naangol ang mga biktima.
Daling girespondehan sa Malaybalay Emergency Rescue Unit ang insidente ug gidala ang mga biktima sa Bukidnon Provincial Medical Center apan gideklarar kining dead on arrival sa attending physician.
Ang usa ka back rider gidala usab sa Polymedic General Hospital aron matambalan sa iyang mga samad. Sa pagkakaron, ang mga motorsiklong nalambigit anaa na sa kustodiya sa Malaybalay City Police Station alang sa hustong disposisyon.