Nadakpan ang usa ka 20-anyos nga estudyanteng babaye human masakpan sa akto nga nangawat og pula nga kabayo o ilimnong makahubog, sulod sa usa ka convenience store sa Barangay San Vicente, Panabo City, Davao del Norte, pasado alas 11:15 sa gabii niadtong Abril 13, 2026.
Giila ang suspek nga si alyas Rose, residente sa giingong lugar. Sumala sa report sa Panabo City Police Station, nasakpan kini sa security guard samtang nagbutang og nagkadaiyang produkto sulod sa iyang itom nga tote bag ug misulay og paggawas nga wala mobayad.
Nakuha gikan sa iyahang posesyon ang kinawat sulod sa maong tindahan nga mga item nga nagkantidad og P300, lakip na ang mga noodles, biskwet, yogurt, lemon juice, ilimnong makahubog ug chocolate drink.
Gipahibalo ngadto sa dinakpan ang iyang katungod ubos sa balaod sa pinulongan nga iyang nasabtan. Sa pagkakaron, anaa na ang suspek sa kustodiya sa Panabo PNP alang sa hustong lakang ug legal nga proseso.