Gipaspasan karon sa House Committee on Justice ang mga pagdungog sa impeachment complaint batok kang Bise Presidente Sara Duterte aron masumite kini sa Senado sa dili pa ang adjournment sa Kongreso sa Hunyo.
Sa pakighinabi sa Bombo Radyo Malaybalay ngadto kang Atty. Oscar S. Moreno, usa ka law professor ug corporate lawyer, iyang gipasabot nga duna’y duha ka pamaagi sa impeachment base sa Konstitusyon. Una mao ang pag-agi sa komite padulong sa plenaryo, ug ikaduha mao ang direct filing kon makakuha og pirma sa labing menos one-third sa mga miyembro sa Kamara.
Matud ni Moreno, mas sayon ang one-third vote sa Kamara, apan mas dako ang hagit sa Senado tungod kay kinahanglan ang two-thirds vote aron pormal nga matangtang sa pwesto ang usa ka opisyal. Gibutyag usab sa abogado nga nag-amping ang Kongreso nga masunod ang due process aron malikayan ang bisan unsang legal nga hagit sa Korte Suprema.
Dugang pa ni Moreno, importante nga mahuman ang mga hearing sa dili pa ang Hunyo aron dili maabtan sa pag-organisa pag-usab sa Senado human sa SONA sa Hulyo. Sumala pa kaniya, ang estratehiya sa kampo sa Bise Presidente mao ang paglangan sa pagsugod sa husay sa Senado, tungod kay kon magsugod na ang pormal nga trial, mahimo nang ma-access sa mga senador ang mga bank records ug uban pang sensitibong dokumento nga magamit sa imbestigasyon.