Gipahingusgan karon sa Malaybalay City Police Station ang ilang seguridad ug crowd control sa tibuok palibot sa Capitol Grounds alang sa nagpadayong Kaamulan Festival.
Sa pakighinabi sa Bombo Radyo Malaybalay ngadto kang PMSg. Ken Hanzel T. Bughaw, ang tigpamaba sa Malaybalay CPS, gibutyag niini nga naka-deploy na ang ilang mga personahe sa mga estratehikong dapit aron masiguro ang paspas nga responde, ilabina karong umaabot nga Sabado diin gilauman ang dagsang sa mga bisita.
Gipunting sa kapulisan ang hugot nga pagbantay batok sa mga kaso sa kawat ug snatching, nga maoy sagad mitala og menor nga insidente sa miaging tuig. Tungod niini, nanawagan ang otoridad sa publiko nga magmatngon sa ilang mga personal nga gamit sama sa cellphone, pitaka, ug mga bag samtang anaa sa tunga sa panon sa katawhan.
Sa pagkakaron, nagpabiling malinawon ang selebrasyon ug wala pa’y natala nga bisan unsang seryosong untoward incident gawas sa pipila ka mulo sa nangawalang butang. Padayon usab ang gihimong adlaw-adlaw nga checkpoints ug pag-roving sa mga pulis sa venue aron masiguro ang luwas nga pagsaulog sa tinuig nga kapistahan sa lalawigan.