Kapin P800,000 nga kantidad sa Shabu, nasakmit sa Barangay Bugo CDO; duha ka suspek, dakpan!

Mukabat sa PhP816,000.00 nga kantidad sa gitouhang shabu ang nasakmit sa mga otoridad human sa malampusong buy-bust operation sa Barangay Bugo, dakbayan sa Cagayan de Oro.

Nadakpan sa hiniusang pwersa sa RPDEU 10 ug COCPO ang mga suspetsado nga giila pinaagi sa alyas nga “Khalid,” usa ka mag-uuma, ug “Risha,” nga usa ka online seller.

Nakuha gikan sa ilang posisyon ang gibana-banaang 120 gramo sa ilegal nga droga lakip na ang marked money nga gigamit sa operasyon.

Nasayran nga si “Khalid” aduna nay miaging rekord sa susamang kaso ug nakaserbisyo kaniadto sa iyang sentensya.

Sa pagkakaron, ang duha ka dinakpan balhog na sa Maharlika Detention Facility samtang giandam na ang kasong paglapas sa Republic Act No. 9165 batok kanila.