Malampusong nakabalik sa kalibutan ang Artemis II human ang makasaysayanong pag-splashdown sa kadagatan duol sa San Diego, California. Anaa sa sulod sa Integrity Capsule ang tibuok team human sa ilang moon mission.
Luwas ang upat ka astronaut nga mao sila si Reid Wiseman, Victor Glover, Christina Koch, ug Jeremy Hansen, human sa siyam ka adlaw nga panaw libot sa bulan nga nagtimaan sa bag-ong hugna sa programa sa NASA Artemis.
Gikan sa katulin nga 23,000 mph (37,000 km/h) sa pagsulod sa atmosphere, mihinay ang kapsula sa tabang sa multi-stage parachute system hangtod sa 20–30 km/h sa wala pa kini mitugpa sa dagat.
Dali nga miresponde ang U.S. Navy gikan sa USS John P. Murtha aron sugaton ang mga crew alang sa medikal nga pagsusi ug recovery operations.
Nagmalampuson ang misyon sa tinguha niini nga sulayan ang mga sistema sa Orion spacecraft ug i-andam ang sunod nga lakang paingon sa pagtugpa na usab sa tawo sa bulan.
Sa kinatibuk-an, niabot sa kapin 400,000 kilometro ang distansya nga gibiyahe sa Artemis II, ug nakahatag kini og mga hulagway gikan sa lunar orbit, lakip na ang talan-awon sa “Earthset.”
Ang malampusong pagbalik sa Artemis II simbolo sa bag-ong paglaum sa panahon sa eksplorasyon sa kawanangan—usa ka kamatuoran nga andam na usab ang katawhan nga motunob sa bulan.