Gikompirma ni Atty. Danilo Dividina, Election Officer sa Comelec Malaybalay, nga ang tanang kandidato nga misalmot sa miaging eleksyon gikinahanglan nga magsumite sa ilang Statement of Contributions and Expenditures (SOCE) sugod niadtong Mayo 13, 2025.
Kini iyang gipadayag atol sa eksklusibong pakighinabi sa Bombo Radyo Malaybalay. Matod ni Atty. Dividina, ang SOCE naglangkob og lima ka porma nga obligadong pun-on sa matag kandidato. Ang maong mga porma naglakip sa komprehensibong detalye kabahin sa ilang mga gasto sa kampanya, mga donasyon, ug mga kontribusyon nga ilang nadawat sa tibuok yugto sa pangampanya.
Gipasabot usab sa opisyal nga ang siyudad sa Malaybalay adunay kapin sa 124,813 ka rehistradong botante, base sa kasamtangang datos sa ilang sistema. Usa sa mga gihatagan og dakong pagtagad mao ang gitudlo nga maximum allowable campaign expenditure alang sa mga kandidato, ilabina sa Local Government Unit gikan sa Mayor paingon sa mga City Councilor.
Subay sa balaod, ang gitudlong maximum campaign expenditure kada botante mao ang ₱3.00 alang sa mga kandidato nga sakop sa rehistradong partido, samtang ₱5.00 kada botante para sa mga independent o katong walay partidong giapilan.Gidugang pa ni Atty. Dividina nga ang paghuman sa eleksyon dili nagpasabot nga tapos na ang obligasyon sa kandidato. Kinahanglan gihapon silang motuman sa mga regulasyon sa Comelec, lakip na ang hustong pagsumite sa ilang SOCE, aron malikayan ang mga posibleng legal nga sangputanan sama sa diskwalipikasyon sa umaabot nga kandidatura.