Nagpabiling naglaum ang sektor sa transportasyon sa Bukidnon nga madawat na ang gisaad nga ayuda gikan sa gobyerno taliwala sa walay hunong nga pagsaka sa presyo sa lana.
Sa pakighinabi sa Bombo Radyo Malaybalay, gibutyag ni Bobong Jomar Juan, usa ka multicab drayber, nga hangtod karon wala pa siya makadawat sa maong fuel subsidy nga gitagana alang sa mga apektadong drayber. Sumala kaniya, daghan sa iyang mga kaubanan ang anaa gihapon sa “waiting list” alang sa second batch sa maong ayuda gikan sa nasudnong kagamhanan.
Taliwala sa maong kakuwang sa suporta ug sa nagkamahal nga gasto sa operasyon, gipahayag ni Juan nga wala sila’y laing kapilian gawas sa pagpadayon sa pagbiyahe niining Semana Santa. Kini aron masiguro nga duna’y ikasustento ug ikapalit og pagkaon alang sa ilang mga pamilya.
Gidugang sa mga drayber nga dako unta og tabang ang maong subsidy aron maibanan ang epekto sa mahal nga gasolina nga miigo na sa ilang inadlaw nga kita. Nanawagan karon ang grupo sa mga tsuper ngadto sa Department of Transportation (DOTr) ug LTFRB nga paspasan ang pagpagawas sa ayuda aron dili sila mapugos sa paghunong sa ilang serbisyo sa publiko.