Nakaangkon ang usa ka lalaki gikan sa Taiwan og problema sa utok o brain hemorrhage human siya nakasakay og roller coaster sa United Arab Emirates (UAE), nga miresulta sa iyang pagpa-opera.
Nasuta nga mibisita kini sa Abu Dhabi ug nisulay sa usa ka kusog kaayong roller coaster sa Ferrari World.
Human sa ride, mibati siya og pagkalipong apan wala niya kini hatagi og dako nga pagtagad.
Sa iyang pagbalik sa Taiwan, didto na misugod ang padayon nga pagsakit sa iyang ulo.
Sa unang eksaminasyon, wala’y nakitang seryosong problema sa scan.
Apan paglabay sa pipila ka bulan, kalit siyang natumba ug gidala dayon sa ospital.
Didto nadiskobrehan nga adunay nagtapok nga dugo sa iyang utok, hinungdan nga gikinahanglan siyang operahan aron matangtang kini.
Matod sa doktor, dili kini tipikal nga stroke, kundili posibleng resulta sa kusog nga pag-uyog sa lawas, sama sa epekto sa roller coaster.
Gipasabot usab nga sa pag taas sa edad sa tawo, gamayng mokunhod ang utok ug mas dali kini molihok sulod sa bungo.
Tungod niini, ug sa kahuyang sa mga ugat, mas mosamot ang risgo nga kini maputol kung ma-expose sa kusog nga lihok o uyog.