Human sa bag-ong nahuman nga eleksyon, gisiguro sa Philippine Drug Enforcement Agency (PDEA) Region 10 nga walay bisan usa nga napiling opisyal sa rehiyon nga nalambigit sa illegal nga droga. Sumala ni Atty. Benjamin Gaspi, Regional Director sa PDEA-10, wala silay nadawat nga lig-on nga ebidensya nga nagdugtong sa bisan kinsa sa mga mipiling kandidato sa eleksyon sa Region 10 sa kalihukan sa droga.
Pahayag pa niini wala silay nakit-an o narekord nga kandidato nga nidaog karon nga adunay kalambigitan sa illegal drug trade dinhi sa Region 10. Bisan pa niana, giangkon sa opisyal nga padayon ang ilang panukiduki sa laing porma sa election-related offenses, lakip na ang vote buying. Dugang pa ni Atty. Gaspi, samtang wala silay koneksyon sa droga, lahi nga isyu ang vote buying.
Kini among gitan-aw uban sa Commission on Elections (COMELEC) ug uban pang ahensya aron masuta kung adunay kasong angay pasakaan. Gipasabot usab ni Atty. Gaspi nga andam ang PDEA-10 nga makigkoordina sa uban pang law enforcement agencies kung adunay mopagawas og reklamo o report bahin sa vote buying, bisan gikan pa sa mga katawhan.
Giklaro pa ni Gaspi nga importante nga makab-ot ang limpyo ug matinud-anong eleksyon, ang mga alegasyon, kung dunay mopagawas og pormal nga report, maong atimanon ug ipasa sa hustong ahensya. Samtang walay direktang nalambigit sa droga nga politiko, nagpabiling alerto ang PDEA Region 10 aron masiguro nga ang rehiyon magpabiling gawasnon sa iligal nga droga ug korapsyon sa eleksyon.