Nakapukaw og atensyon sa social media ang gibuhat nga pagtabang nila Pinoy singer-songwriter Chito Miranda ug anak niini nga si Miguel Alfonso “Gab” Miranda sa usa ka amahan nga nag-busking sulod sa University of the Philippines Diliman.
Sa mikaylap nga video, makita nga miduol si Chito uban sa anak niini aron suportahan ang usa ka street performer nga amahan nga naningkamot makakwarta pinaagi sa pagkanta ug pagtugtog.
Dili lamang pinansyal nga tabang ang gihatag, apan lakip na ang moral support usab, diin nakig-jam pa kini sa performer, nga nakahatag og dugang kadasig ug kalipay sa maong amahan.
Daghang netizens ang natandog sa maong eksena, hilabi na sa paglakip ni Gab sa pagtabang, nga gihulagway isip maayong ehemplo sa pagtudlo sa kabataan sa kahulugan sa pagkamabination ug pagpakabana sa isigkatawo.
Giila usab sa publiko ang pagkamapainubsanon ni Chito, nga bisan usa na ka iladong musikero, nagpabiling duol sa ordinaryong katawhan.