Mipasidaan si Senate President Pro Tempore Panfilo “Ping” Lacson nga posibleng mabutang sa peligro ang Commission on Appointments kon CA kung usbon niini ang opisyal nga rekord sa pagdungog kaniadtong Pebrero 4, 2026, diin naglangkob sa kontrobersyal nga pamahayag ni Senador Rodante Marcoleta sa gikaingong pagsurender sa Kalayaan Island Group sa Palawan.
Matud ni Lacson, ang maong lakang mahimong mokabat sa falsification sa legislative documents kung usbon ang opisyal nga record sa hearing.
Adunay katugbang nga silot ubos sa Revised Penal Code of the Philippines, partikular sa Article 170, batok kang bisan kinsa nga mag-ilis sa mga legislative documents nga wala’y igong otoridad.
Gipasabot sa Senador nga ubos sa Article 170, si bisan kinsa nga mag-usab og balaudnon, resolusyon, o napatuman nga ordinansa, sa Kongreso man o sa lokal nga konseho, mahimong mapahamtangan og correctional imprisonment sa labing taas nga panahon ug multa nga P1.2 milyones.
Sa pagkakaron, pending pa ang mosyon ni Sen. Marcoleta sa pag-amendar sa kabahin sa hearing record, ug gipadala na kini ngadto sa Committee on Rules sa Commission on Appointments alang sa pagrepaso.
Sa laing bahin, si Sen. Lacson, gikatahong mipadangat sa mga kabalaka ngadto kang Senate President Vicente “Tito” Sotto III, kansa mao usab ang Chairman sa Commission on Appointments.