Napakyas sa field tests sa Bureau of Internal Revenue (BIR) ang 78 sa 189 ka fuel station nga gisusi sa ahensya sa 10 ka revenue region, isip kabahin sa kampanya batok sa ilegal nga patigayon sa petrolyo.
Base sa resulta sa inspeksyon, 111 ka fuel station ang nakapasar samtang 78 ang napakyas, nga katugbang sa 41.3 porsyento sa kinatibuk-ang gidaghanon sa mga gisusi.
Tungod niini, giselyohan sa BIR ang mga apektadong fuel pump sa maong 78 ka establisemento, lakip ang mga imbentaryo nga mokabat sa 900 mil 250 punto 69 ka litro nga nalambigit sa mga napakyas nga field test.
Ang independent third-party testing ug verification gipangulohan sa SGS Philippines.
Matud ni BIR Commissioner Charlito Martin R. Mendoza, padayon nilang susihon ang mga tinubdan sa lana nga nalambigit sa mga estasyon nga napakyas sa inspeksyon, lakip ang dugang nga beripikasyon ug pagsulay sa mga fuel depot.
Apan giklaro sa komisyoner nga ang pagkapakyas sa usa ka fuel station sa pagsulay dili dayon nagpasabot nga wala usab nagtuman sa mga regulasyon ang supplier niini.
Gibug-atan ni Mendoza nga kabahin kini sa DARES reform agenda sa BIR ubos sa Revenue Collection and Base Protection aron mapugngan ang ilegal nga patigayon nga makapaluya sa koleksiyon sa buhis ug makahatag og dili patas nga kompetisyon sa mga negosyanteng nagtuman sa balaod.