Gikompirmar sa Department of Migrant Workers nga pito ka Pilipinong tripulante sa usa ka container ship ang nasamdan human maigo sa drone attack sa Strait of Hormuz nga giingong may kalabotan sa Iran.
Matod ni Hans Leo Cacdac, upat sa mga Pilipinong seafarers ang nakaangkon og minor injuries samtang tulo pa ang padayon nga giobserbahan tungod sa mas seryosong samad nga ilang naangkon sa insidente niadtong Mayo 5.
Giingon ni Cacdac nga kabahin ang mga nasamdan sa crew sa container ship nga San Antonio.
Giklaro usab niya nga dili kini French-flagged vessel supak sa unang report sa pipila ka international media.
Sumala pa sa DMW, giluwas dayon gikan sa barko ang mga Pilipinong tripulante ug karon ginatambalan sa ospital uban sa tabang sa mga opisyal sa embahada ug labor attaches sa Pilipinas sa abroad.
Una nang gitaho sa ahensya nga kapin 1,400 ka Pilipinong seafarers na ang luwas nga nakagawas sa Strait of Hormuz taliwala sa nagkagrabeng tensyon sa taliwala sa Iran ug sa US-Israel alliance.
Padayon usab nga ginamonitor sa gobyerno ang sitwasyon aron masiguro ang kaluwasan sa mga Pilipino sa rehiyon.