Nakaplagang patay ang usa ka 54-anyos nga lalaki nga naglutaw sa irrigation canal sa Purok Rang-ay, Barangay Dagat-Kidavao, Valencia City, Bukidnon kagahapong adlawa.
Sumala sa Bukidnon Police Provincial Office, nadiskobrehan ang lawas sa biktima human kini nakita nga naglutaw sa maong kanal.
Base sa inisyal nga imbestigasyon, alas-9 sa buntag niadtong Agosto 11 ang biktima, kataposang nakit-ang buhi sa ilang pinuy-anan, sumala sa iyang live-in partner.
Usa ka 43-anyos nga lalaki ang nakadiskubre sa lawas ug mitaho sa maong insidente. Nasayran usab nga adunay epilepsy ang biktima.
Sa pag-usisa sa imbestigador, walay nakitang timailhan sa foul play o pisikal nga pakigbisog sa lawas. Gituohang pagkalumos ang posibleng hinungdan sa kamatayon niini.
Sa pagkakaron ang mga patayng lawas gitugyan na sa pamilya alang sa pagpahimutang niini.