Napalgan nga walay kinabuhi ug tunga sa hubo ang usa ka 44-anyos nga lalaki sulod mismo sa usa ka staff house sa hatchery sa Purok 6, Tubigon, Maramag, Bukidnon.
Subay sa report nga giduso ni Bukidnon Police Provincial Office (BPPO) Provincial Director PCOL Oliver Navales, dinalian nga miresponde ang Maramag Municipal Police Station human makadawat og tawag gikan sa usa ka concerned citizen. Pag-abot sa mga pulis sa maong dapit, nasayran nga nagsandig na sa bongbong sulod sa tunga nga kwarto ang lawas sa biktima.
Sa gihimong inisyal nga pakisusi, gibutyag sa mga kauban ug saksi nga dugay na matud pa nga nag-antos sa pabalik-balik ug grabeng ubo ang maong lalaki. Katapusan kining nakit-an nga buhi niadtong Hulyo 7 sa udto sa usa ka technician sa maong planta. Gikumpirma sa kapulisan nga walay nakit-ang bisan unsang samad o timailhan sa foul play sa lawas sa biktima, ug gidala na kini sa Rural Health Unit (RHU) sa Maramag aron masusi sa doktor ang tinuod nga hinungdan sa iyang kamatayon.