Patay ang usa ka 34-anyos nga lalaki human gidunggab sa iyang kaaway atol sa usa ka vigil sa Purok 10, Barangay Old Damulog, Bukidnon niadtong Mayo 26, 2026.
Base sa inisyal nga imbestigasyon sa kapulisan, mitawag ang usa ka concerned citizen sa Damulog Municipal Police Station alas 11:45 sa gabii aron ipahibalo ang maong pagpanunggab. Nasayran nga samtang nagtambong sa vigil sa ilang silingan, naglalis ang biktima ug ang suspetsadong nailhang alyas Edgar, taga-Sitio Purok otso (8) sa maong barangay.
Atol sa ilang grabeng panaglalis, kalit nga mibunot og kutsilyo ang suspetsado ug dinalian nga gidunggab ang biktima diin naigo kini sa wala nga ibabaw nga dughan ug ubos nga bahin sa tuo nga dughan. Dali pa nga gidala ang biktima ngadto sa balay tambalanan, apan gideklarar na kining dead on arrivall.
Sa pagkakaron, padayon pa ang gihingusgan nga hot pursuit operation sa mga personahe sa Damulog MPS aron madakpan ang suspetsadong daling mikalagiw human sa maong insidente.