Nasakmit sa Jasaan MPS ug Police Intelligence Unit sa MORPO ang 335 ka reams sa gidudahang smuggled cigarettes nga gibana-banang P268,000 ang kantidad atol sa operasyon sa Purok-3, Lower Jasaan, Jasaan, Misamis Oriental alas-3:45 sa hapon niadtong milabay’ng adlaw.
Nasikop usab ang 67-anyos nga vendor nga giila sa alyas nga “Ino,” residente sa Jasaan.
Nakaplagan sa mga otoridad ang nagkalain-laing brand sa sigarilyo nga gipang-display ug gituohang gibaligya sa maong lugar human sa sumbong sa usa ka concerned citizen.
Gipagawas ang Citation Ticket sa tag-iya sa tindahan tungod sa paglapas sa Municipal Ordinance No. 122-2019 nga nagdili sa pagbaligya og tobacco products sulod sa 100 metros gikan sa mga eskwelahan, playground ug pasilidad nga kasagarang adtoan sa mga menor de edad.
Lakip sa nakumpiska ang Pragon, Delta, Milano, Gastorse, Cannon, Fort, Modern Red, Commando, Palacio, Champion ug Englishman cigarettes.
Gidala na ang tanang nakumpiska sa Jasaan MPS alang sa dokumentasyon ug tukmang disposisyon.