Mibutyag ang Estados Unidos sa pag-apruba sa $322 milyon nga baligya sa armas aron palig-onon ang depensa sa kahanginan sa Ukraine ug ang ilang mga armored combat vehicles.
Ang maong pahibalo sa pagbaligya misunod human nga temporaryong mihunong ang Washington sa pipila ka mga padalang armas ngadto sa Ukraine niadtong miaging buwana bisan pa sa grabe nga mga atake sa misayl ug drone sa Russia.
Ang pagbaligya sa HAWK air defense equipment ug mga serbisyo mokabat og $172 milyon, samtang ang mga gamit ug serbisyo alang sa Bradley Infantry Fighting Vehicle mokabat og $150 milyon, matod sa US Defense Security Cooperation Agency (DSCA).
Matod sa DSCA, ang gitanyag nga baligya sa HAWK equipment, diin makatabang sa Ukraine nga mapaayo ang ilang kapasidad sa pag-atubang sa kasamtangan ug umaabot nga mga hulga pinaagi sa paghatag kanila og mas lig-on nga depensa sa kahanginan alang sa ilang kaugalingong depensa ug seguridad sa rehiyon.
Samtang ang mga gamit ug serbisyo sa Bradley makatabang sa pagtagbo sa madali nga panginahanglan sa Ukraine nga palig-onon ang lokal nga kapasidad sa pagmintinar aron mapadayon ang taas nga operational rate sa mga sakyanan ug armas nga gihatag sa Estados Unidos.
Giaprobahan sa State Department ang posibleng baligya ug ang DSCA mipasa sa gikinahanglang pahibalo ngadto sa Kongreso sa Estados Unidos, nga kinahanglan pa magpirma sa maong mga transaksyon.
Ang pinakabag-o nga gitanyag nga military sale ngadto sa Ukraine misunod sa usa pa nga gipahibalo niadtong Mayo nga nagkantidad og $310.5 milyon alang sa F-16 training ug sustainment.
Si Presidente Vladimir Putin sa Russia misugod sa tibuok hugna nga pagsulong batok sa Ukraine niadtong 2022 ug wala magpakita og interes sa pagtapos sa gubat bisan pa sa pagpugos sa Estados Unidos.
Sa ilawom ni kanhi Presidente Joe Biden, ang Estados Unidos mipasalig og labaw sa $65 bilyon nga tabang militar alang sa Ukraine.
Apan si Presidente Donald Trump, nga dugay na kini nagduhaduha sa pagtabang sa Ukraine, diin wala magpahibalo og military aid packages alang sa Kyiv sukad siya mibalik sa poder niadtong Enero.