Nagtapok sa Boston ang mga horror enthusiasts aron makatala og bag-ong Guinness World Record alang sa pinakadaghang tawo nga nagsuot og costume ni Michael Myers, ang bantugang karakter sa usa ka Halloween film.
Gipangulohan sa Ill Fonic, Gun Interactive, Compass International Pictures, ug Further Front ang maong kalihokan atol sa PAX East expo, diin 254 ka partisipante ang nagsul-ob og asul nga coveralls ug makahahadlok nga maskara, nga orihinal nga gi-base sa nawong sa aktor nga si William Shatner.
Dungan niini, gipakita usab ang unang playable demo sa umaabot nga video game nga “Halloween.”
Sumala kang Miles Dompier, isip mga dako nga fans sa horror, nakita nila kung giunsa sa mga tagahanga ang pagpakita sa ilang gugma sa Halloween pinaagi sa lain-laing conventions.
Busa ilang gidala ang “Myers’ House” sa PAX East aron mahatagan og kahigayonan ang publiko nga masinati ang demo sa duwa ug sa samang higayon saulogon ang fandom pinaagi sa pagpuno sa Boston sa imahe sa “Boogeyman.”
Gikumpirma sa Guinness World Records nga ang 254 ka partisipante maoy opisyal nga nakab-ot sa rekord alang sa “largest gathering of people dressed as Michael Myers.”