Gikumpirma ni Ukrainian President Volodymyr Zelensky nga naigo sa ilang militar ang duha ka dakong oil refinery sulod mismo sa teritoryo sa Russia pinaagi sa usa ka long-range drone attack.
Sa usa ka online post, gipadayag ni Zelensky nga gilagbas sa Defense Forces sa Ukraine ang Slavneft-Yanos refinery didto sa Yaroslavl ug ang Bashneft-Novoil refinery sa Bashkortostan. Dugang pa sa presidente, naigo usab sa ilang puwersa ang duha ka military patrol boats ug pipila ka barko gikan sa shadow fleet sa Russia didto sa Black Sea.
Samtang gipahayag sa gobernador sa Yaroslavl nga si Mikhail Evraev nga ilang napusil ug nabuba ang mga drone sa Ukraine, ang mga nahagbong nga debris o tipak maoy hinungdan sa pagkasunog sa tulo ka kabahayan. Upat ka tawo ang naangol tungod sa nasurop nga shrapnel, apan maayo na lang kay walay natala nga namatay sa maong insidente.