Gibutyag ni Senador Imee Marcos nga gipunting matud pa ang kasamtangang 13-ka miyembro sa Senate majority bloc tungod sa sunod-sunod nga case buildup ug mga reklamong giandam batok sa ilang grupo.
Matud sa senadora, adunay mga tawag ug text messages nga ilang nadawat gikan sa mga tawo nga konektado sa Ombudsman, Department of Justice (DOJ), ug National Bureau of Investigation (NBI), nga naghisgot sa giingong mga kaso nga giandam batok kanila.
Gipasabot ni Marcos nga nagkabug-at ug nagkadaghan ang mga alegasyong gi-atubang sa ilang grupo, ug gilakip niini sila Senators Rodante Marcoleta, Jinggoy Estrada, Joel Villanueva, Chiz Escudero, ug ang magsoon nga sila Senators Camille ug Mark Villar.
Lakip usab sa iyang gihisgutan si Senador Ronald “Bato” dela Rosa nga adunay arrest warrant gikan sa International Criminal Court (ICC) may kalabotan sa war on drugs sa administrasyon ni kanhi Pangulong Rodrigo Duterte.
Matud pa ni Marcos, posible usab nga maatubang sa susamang kaso si Senador Bong Go human mapangalanang co-perpetrator sa maong isyu.
Tungod niini, nangutana ang senadora kon pamulitika ba o pag-ipit ang nahitabo batok sa ilang grupo.
Gikuwestiyon usab niini nganong mas grabe karon ang tensyon ug kasamok sa Senado itandi sa mga miaging re-shuffle sa liderato. Sumala ni Marcos, sa miaging kausaban sa liderato diin si kanhi Senate President Tito Sotto III ang napili, wala sila mireklamo bisan wala nila kini suportahi.
Sa katapusan, nagpahayag si Marcos nga naglaom siya nga dili madayon ang giingong “persecution” batok sa ilang grupo ilabina sa nagkadaghang problema nga giatubang sa nasud.