Giingong kulang sa kapasidad nga box culvert ang nahimong hinungdan sa pagbaha nga nagbilin og gibanabanang kapin ₱5 milyon nga kadaot sa usa ka flower farm sa Barangay Dalwangan, Malaybalay City.
Sa pakighinabi sa Bombo Radyo Malaybalay kang Junrey Ruiz Perales, tag-iya sa Westland Flower Farm, nahitabo ang kalit nga pagbaha pasado alas-3:00 sa hapon niadtong Biyernes human nga dili na maka-akomodar sa kusog nga agos sa tubig ang maong drainage system.
Gibanabana nga umabot sa ₱2 milyon pesos ang kadaot sa ilang mga greenhouse, samtang kapin ₱3 milyon pesos usab ang nawala nga bili sa mga bulak nga maani ug mapamaligya na unta. Tungod niini, kapin sa 15 ka pamilya sa mga trabahante ang nawa-an og panginabuhian.
Gipahayag usab ni Perales nga wala sila nakonsulta sa contractor sa wala pa gi-instalar ang maong box culvert. Tungod niini, nanawagan siya sa Department of Public Works and Highways (DPWH), contractor, ug sa lokal nga panggamhanan nga ayohon ug dugangan ang mga box culvert sa maong lugar aron makabalik na sa pagtrabaho ang iyang mga trabahante.