Usa ka magtutudlo og yoga sa Vietnam ang nakabuak og bag-ong rekord sa Guinness human kini nakahimo og 86 ka push-ups ilawom sa tubig sa usa ra ka gininhawa.
Gipahigayon sa usa ka swimming pool sa Ninh Binh, Vietnam ang maong talagsaong aksyon sa 38 anyos nga natawo sa India nga si Kamal Kaloi.
Sumala ni Kaloi, ang iyang gihimong pagbansay sa calisthenics ug sakto nga pagpugong sa gininhawa ang nakatabang pag-ayo aron iyang maabot ang maong rekord.
Human sa gihimong pagrepaso sa tanang ebidensya, pormal nga gikumpirma sa Guinness World Records nga naangkon ni Kaloi ang opisyal nga titulo alang sa “most underwater push-ups on a single breath (male)”.
Dili na bag-o si Kaloi sa natad sa pagbuak og rekord. Niadtong tuig 2020, siya usab ang naghupot sa Guinness World Record alang sa pinakadaghang gitawag nga consecutive underwater yoga positions diin nakahimo kini og 21 ka posisyon ilawom sa tubig.